गीत: विकास का खातिर

चला दीदा भुलौं भै-बन्धु वोट दयाण जौला।
ईमानदार नेता लौण ईमानदार सरकार बणोंला।।
वोट दयाण सी क्वी छुट्टी नई जौ इंनु पैगाम द्याण।
घर-घर जैक सब्बी वोटर बूथ तक पौछाण।।
दादा-दादी दिब्यांग जनु की मदद करण।
जु नी सकलु बूथ तक घर मु ही वोट दिलाण।।
चला दीदा भुलौं भै-बन्धु वोट द्याण जौला।
ईमानदार नेता लौण ईमानदार सरकार बणौला।।
गौं-गौं मा घूमी-घूमीक प्रचार-प्रसार कन्न।
वोट द्याण सी क्वी छुट्टी नी जौ इंनु यतन कन्न।।
बड़ा-बड़ी, चाचा-चाची कैं यांकू पाठ पढौण।
सब्बुन वोट द्याण अर ईमानदार सरकार बनौण।।
चला दीदा भुलौं भै-बन्धु वोट द्याण जौला।
ईमानदार नेता लौण ईमानदार सरकार बणौला।।
सरकार इन्नी बनौण जु ध्यान सब्बुकु रखौन।
क्वी बेरोजगार नी रौ अर क्वी भैर नी जौ यखान।।
अवा सब्बि कट्ठा ह्वेक वोट दी द्यौला।
अपणा-अपणा मतूकू दान करयोला।।
चला दीदा भुलौं भै-बन्धु वोट द्याण जौला।
ईमानदार नेता लौण ईमानदार सरकार बणौला।।
कैका बोल्यां पर वोट नी द्याण समझदारी दिखौंण।
अपणा मत कु महत्व सब्बि कैं बतौंण।।
विकास का खातिर सब्बि वोट दीक औला।
पहाड़ मा विकास औ राज्य मा खुशहाली ल्योला।।
चला दीदा भुलौं भै-बन्धु वोट द्याण जौला।
ईमानदार नेता लौण ईमानदार सरकार बणौला।।

*डॉ0 दलीप सिंह बिष्ट